FAMILIA YAKUMBWA NA MAUZAUZA

Chande Abdallah na Deogratius Mongela

INATISHA! Familia ya Zidadu Kasimu (34) inayoishi Mlandizi, Pwani inakumbwa na mauzauza nyakati za usiku kwenye nyumba yao baada ya wageni wanaofika na kulala vyumbani kusimulia visa vya kutisha vinavyohusisha ushirikina.

Baba mama na mtoto wao wakiwa na huzuni.

Akizungumza na gazeti hili mwishoni mwa wiki iliyopita, Zidadu alisema vitimbwi hivyo vilianza mwaka 2004 baada ya wageni wake kusimulia ndoto za ajabu, majinamizi, kuguswa na mtu asiyeonekana na kusikia sauti za watu wakitwanga mpunga.
“Yaani kaka ilifikia hatua wageni wakija wanakimbia usiku, wengine wakiamka wanaondoka bila kuaga na hawarudi tena, sasa tumefunga vyumba hivyo tunalala wote chumba kimoja ambacho hakina mauzauza,” alisema Zidadu.

Nyumba inayoishi familia hiyo.

Mke wa Zidadu, mama Mau alisema licha ya mauzauza, pia kuna wakati fedha zao hupotea kiajabu na kuna siku walishangaa kuona mfupa ukitoka chooni na kuingia uvunguni mwa kitanda jambo lililowashtua sana.